الفوانيس الورق من تراث زينة رمضان، الذي لا يسقط بالتقادم، وكأنها ورث ثمين تحرص عليه الأجيال المتعاقبة، ومن بينهم يوسف تامر، صاحب الـ21 عاماً، ابن محافظة كفر الشيخ، الذي فكر في إعادة تدوير بقايا الورق، وصناعة فوانيس مختلفة، احتفالاً بشهر رمضان المبارك، مما جذب أنظار المحيطين به، وطلبوا منه صناعة فوانيس مماثلة.

صناعة الفوانيس الورق مع بداية شهر شعبان

بدأت فكرة «يوسف» في صناعة الفوانيس الورق مع بداية شهر شعبان، كما روى لـ«الوطن»: «فكرت إني أعمل فانوس بنفسي، ومالقيتش أفضل من الفانوس الورق اللي بيفكرنا بطفولتنا وبالزينة اللي كنا بنفّذها واحنا صغيرين في شوارعنا، وكانت لها فرحة كبيرة غير الزينة الجاهزة، وبالفعل بدأت التنفيذ».

طبّق الشاب العشريني ما تعلمه في طفولته من والدته في تنفيذ الفوانيس الورق: «والدتي وأنا صغير علّمتني طريقة صناعة الفوانيس الورق، وطبّقت اللي اتعلمته دلوقتي، حاولت أعمل أول فانوس ونجحت، وبعد كده نفّذت أكتر من 20 فانوس، واستخدمت 3 كتب قديمة في الفانوس الواحد، وخيط شيلد لتقفيل الفانوس، والفانوس الواحد بياخد وقت مني ساعة بس، وبيتكون من 3 قطع: الرأس عبارة عن هرم، والنُّص عمودي، وقاعدة الفانوس، وارتفاعه متر، والفوانيس بنفس شكل الورق مش بالعب فيها، أنا فكرت ألون فانوس، بس لقيت إنّ التلوين هيخلي الورقة تلين».

«يوسف»: يكفيني فرحة الناس ودعوة حلوة

يعمل «يوسف» بجانب دراسته في إحدى المكتبات بمدينة بيلا ويحرص على تنفيذ الفوانيس الورق في وقت فراغه: «الموضوع مش بيشغلني في حاجة، لأني بانفذ الفوانيس الورق في وقت الفراغ، وكمان مش مكلف، لأني باستخدم ورق قديم وخيط موجود عندي، وهاديت بالفوانيس ناس كتير بدون مقابل، وكانوا مبسوطين أوي، وناس كتير كلمتني علشان أنفّذ لها فوانيس، واللي عايز باقول له يجيب الورق والخيط الشيلد وأنا أنفذ له، ويكفيني فرحة الناس، ودعوة حلوة».